Арманжан Байтасов, қазақстандық кәсіпкер, құрамына MuzzOne телеарнасы, «Бизнес-FM» радиосы және Businessfm.kz сайты, Forbes Kazakhstan және Forbes Georgia журналдары кіретін Tan Media Group компаниясының иесі. 
YPO Қазақстандағы филиалының мүшесі, «Асыл Мирас» қайырымдылық қорының қамқоршылық кеңесінің мүшесі, IQanat білім беру жобасының қатысушысы, Қазақстан Медиа Альянсының негізін қалаушы, ҚР Президенті жанындағы Ұлттық Қоғамдық сенім кеңесінің мүшесі.

 
Өмірлік ережелеріңізбен бөлісіңізші...
Бұл ережелер емес, көбінесе менің өмірімде қалыптасқан, өзіммен және айналамдағы әлеммен үйлесімді өмір сүруге мүмкіндік беретін қағидалар.
Біріншісі – айналаңыздағы адамдарға және өзіңізге деген адалдық. Екіншісі – үнемі даму және жаңа нәрсе ашу.Кез келген нәрсе жаңа болуы мүмкін: кітап, танысу, форумда сөйлеген сөз, үйренген әуен. Мұның бәрі сіздің өміріңізді оқиғаларға толы, ал сізді басқа адамдар үшін қызықты етеді.
Ал үшінші маңызды қағида – бұл тайм-менеджмент, уақытты құрметтеу, өйткені ол өте тез өтеді және өмірдегі ең биік асыл зат болып табылады.
 
Сіздің ойыңызша, заманауи БАҚ-ның ең маңызды рөлі қандай – ақпараттандыру, көңіл көтеру, ағарту немесе ...?
Жоғарыда айтылғандардың бәрі өте маңызды. Мен тіпті бір нәрсеге басымдық бере алмаймын, өйткені мен БАҚ-ын екі жақтан бағалаймын, негізін қалаушы ретінде де, контентті тұтынушы ретінде де. Бүгінгі таңда заманауи ақпарат құралдарының рөлі өте зор, олар барлық жерде бар деп айтуға болады. Жай ғана смартфоныңды ашасың да, кез келген ақпаратты табасың. Бұқаралық ақпарат құралдары үшін еркіндік пен бәсекелестік маңызды, ал тұтынушы үшін не оқып, не көруге болатынын таңдау мүмкіндігі болуы керек. 
 

 

Бүгінгі таңда халық БАҚ-нан, журналистерден не күтеді деп ойлайсыз?
Әлемнің шынайы бейнесін. БАҚ-ның маңызды рөлі – өз аудиториясына сенім ұялату, шынайы және сенімді болу.
 
Өз жолыңызды қалай табуға болады? Мен өз ісімді істеп жатқанымды қалай білемін? Мен өмірімді осыған арнағым келеді ме?
Ең бастысы, өзіңізге ұнайтын істі табу, кәсіпқой болу, ал материалдық құндылықтарға қатысты барлық нәрсе міндетті түрде келеді. 
Әлем тез өзгеріп жатыр. Есіңізде болса, біз түні бойы ойын клубтарында отыратындарға күмәнмен қарайтынбыз, ал қазір бұл әлем чемпионаттары мен миллионер ойыншылары бар тұтас киберспорт индустриясы.
Сондықтан міндетті түрде өзіңізге ұнайтын істі іздеу қажет, ал қалғаны жүре түзелер.
Қызығушылықты жоғалтпау үшін балаңызға ақыл-кеңеспен, іспен және үлгімен көмектесу керек. Көбірек қозғалыңыз, бірге спортпен айналысыңыз, қызығушылықтарыңызды, мақсаттарыңызды анықтаңыз, мүмкіндіктерді өлшеңіз, сонда сіз міндетті түрде жетістікке жетесіз.
 
Сіздің өміріңізде қандай өзгерісті кезең болды?  
Көптеген өзгерісті кезең болды. Біріншісі мамандықты таңдаумен байланысты болды.  Сегізінші сыныпта ата-анам маған немен айналысамын, қай университетке түсемін деп ойлайтын кез келді деп нұсқау берді. Таңдау тарихшы мен журналист арасында тұрды.  Журналистика басым болды. Бірақ журналистика факультетіне түскің келсе басылымдар керек, сондықтан мен көптеген газет редакцияларымен жұмыс істей бастадым. Жастар мен балалар студиясында, теледидар мен радиода жұмыс істедім. Сол кездегі көрнекті журналистермен таныстым.
Екінші өзгерісті кезең – университетке түсу, оқу және студенттік орта мен үшін мүлде басқа әлем ашты. Жаңа қарым–қатынастар, жаңа достар пайда болды – мұның бәрі маған адам ретінде, зияткерлік деңгейіме әсер етті, ой-өрісімді кеңейтті. Елдегі оқиғалар да жай өтіп кеткен жоқ - қайта құру кезеңі, Кеңес Одағының ыдырауы, үлкен өзгерістер...
Тағдырдың тағы бір өзгерісті кезеңі – үйлену.  Жұбайым Дилярамен ерте үйлендік.  Отбасының амандығы үшін жауапкершілік пайда болды, ақша табуды, қамқорлық жасауды үйрену қажет болды.
Меніңше, мен ғана емес, менің бүкіл ұрпағым да өзгерісті кезеңдерден өтті.

 

 

Шабыт сізді тастап кететін (сіз өзіңізге, бизнесіңізге сеніміңізді жоғалтатын) кездер бола ма? Амал қандай? Не істейсіз?
Шабыт – бұл түсіндірілмейтін нәрсе, сондықтан оған үнемі сенудің мағынасы жоқ. Кез келген адам сияқты мен де күмәнмен, алаңдаушылықпен өмір сүремін. Онсыз емес.  Бірақ құлдырау немесе депрессия күйі маған тән емес. Бірақ ауырған кезде, физикалық жағдай психологиялық күйге де әсер етеді. Сондықтан мен баршаңызды денсаулығын қадағалап, спортпен шұғылданып, мұңаймауға шақырамын.
 
Егер сіз өткен, қазіргі немесе болашақтағы кез келген оқиғаның куәсі бола алсаңыз, қайсысын таңдар едіңіз? 
Әрине, болашақты, адамзаттың одан әрі қалай дамитыны және оның қайда келетіні өте қызықтырады. Дәл осы болашақта біз қазір өмір сүріп жатырмыз. Көптеген жылдар бұрын бұл бізге өте алыс нәрсе болып көрінді, бірақ біз қиялдаған көптеген нәрселер шындыққа айналды, мысалы, бейне телефондар, компьютерлер, гаджеттер. Көп ұзамай ғарышқа саяхат қарапайым адамдар үшін шындыққа айналуы мүмкін. Сондықтан мен болашаққа көбірек көңіл бөлемін. 
 
Сүйікті кітаптарыңыз немесе шығармашылық кейіпкерлеріңіз туралы айтыңызшы.  Неліктен оларды таңдадыңыз?
Менің сүйікті кітаптарым мен жазушыларымның көптігі сонша, егер біреуге басымдық берсем, басқа авторлардың алдында ұят болады. Өткен жылы карантинде мен Лев Толстойды толығымен қайта оқып шықтым. 16 жаста және 50 жаста оқылған «Соғыс пен Бейбітшілік» екі түрлі нәрсе. Қабылдау, түсіну, пайымдау. Барлығы басқаша. Романдағы оқиғалар арқылы Наполеон соғыстарын, Ресей мемлекетінің тарихын зерттеуге қызығушылық туды. Бірақ бірнеше жыл бұрын мен Толстойды сүйікті жазушыларымның бірі деп атамас едім.
Заманауи авторлар арасында Халед Хоссейни ұнайды.Ауғанстандағы соңғы өзгерістердің әсерінен оны қайта оқып шықтым.«Желдің артынан жүгіруші», «Мыңдаған жарқыраған күн» кітаптарының жақсы жазылғаны сонша, мен оларды оқуға кеңес беремін.
Менің ойымша, қазір поэзия туралы аз айтылады, бірақ мен өлеңдерді өте жақсы көремін. Блок пен Есенинді ерекше сүйсініп қайта-қайта оқи аламын. Маған тілдің әуезділігі мен пластикасы ұнайды. Оқисың да, көз алдыңа үйшікті, күзді, қисық Мәскеу көшелерін елестетесің. 
Көп уақытымды іскерлік әдебиеттерге арнаймын, барлық жаңа өнімдерді мұқият қадағалаймын, маған Рэй Далионың «Қағидалары» ұнады. Мұндай кітаптар бизнесіңіз үшін жаңа идеялар туралы ойлануға негіз береді.
Жалпы айтқанда, оқуға құмар болыңыз. Кітап оқу бізді байытады, күштірек, ақылды етеді. Уақыт өте сіздің көркемдік талғамыңыз пайда болады, сонда сізге не қажет екенін түсінесіз.